Tal ambteners jaorliks halveren

Weeromme naor Artikelen
Home


Tal ambteners jaorliks halveren

In de L.C. van de vuuftiende was 't weer es goed raek. In Spange moet een mooi gruunschilderd stallegien van zoe'n aanderhalve meter hoge veur twie ponnies, votendaoliks ofbreuken wodden omreden d'r gien bouwvergunning veur anvraogd is (en ok niet meer verliend wodden zal). Op de volgende bladziede: 'n Boomkwekeri'je past niet in de bosrieke omgeving van Gaasterlaand. Neffens mi'j twie starke veurbielden hoe een stellegien ambteners heur weer es gellen laoten moeten. Ze willen ok graeg dat alle hedegies in een straote in krekliek etzelde medel knipt wodden, ston een dag of wat leden in dezelde kraante. Nog een schoffien eerder konnen een stel ambteners heur hielendal uutleven doe ze een ni'jbouwhuus vunnen waor een peer deuren twie centimeter te smal bleken neffens de tekenings. Nog even en ze verdoen heur tied mit et maeken van een VHI-besluut (Verplicht Huselike Inrichting) en beslissen daordeur waj' wel, en veural ok juust niet an bloempies veur 't raem staon hebben meugen.

De goeien niet te nao vanzels, mar zollen disse baentiesmannen now warkelik niet deur hebben hoe zi'j op disse wieze et leven van een hiele protte meensken frustreren? We leven in een vri'j laand -zeggen ze- mar d'r kan en mag zo staorigan niet al te vule meer zoj' zo daenken. En dan mar praoten over de aachteruutgaank van de leefberhied in de steden en dörpen! Van mien dokter ma'k mi'j niet tevule opwienen, dat ik argere mi'j niet meer mar verbaoze mi'j allienig nog. Et korps van dit soorte ambteners meugen ze van mi'j elk jaor halveren. Ie zullen zien dat et dan mit de leefberhied, gemienschopszin, norms en weerden vanzels wel een stok beter gaon zal.


© Piet/er Bult